Дээрхийн гэгээнтэн 14-р Далай лам  өнгөрсөн сард манай улсад айлчлал хийсэн. Түүний айлчлалыг манай урд хөрш БНХАУ-ын зүгээс хүчтэй эсэргүүцэж, удаа дараа  манай Засгийн газар, ГХЯ-нд албан бичиг хүргүүлсэн байдаг. Гэсэн хэдий ч тухайн үед албаныхан Далай ламын айлчлалыг ямар ч улс төрийн зорилгогүй, шашны айлчлал хэмээн тайлбарласнаар Далай лам манай улсад гурав хоног айлчлаад буцсан.

Айлчлалынхаа хүрээнд сүсэгтэн олонтой уулзалт хийснээс өөр үйл ажиллагаанд оролцоогүй. Тэгвэл Далай ламын айлчлал өндөрлөсний дараа БНХАУ-ын талаас нэлээд хатуу мэдэгдэл гаргаж, хоёр орны улс төрийн суурь харилцаанд сэв суулаа. Монгол улс энэ харилцааг хэвийн байдалд оруулах ёстой гэж мэдэгдсэн. Улмаар арваннэгдүгээр сарын 28-нд тус улсад айлчлах байсан Шадар сайдын айлчлалыг тодорхойгүй хугацаагаар цуцалсан. Үүнээс хойш манай эрх баригчид БНХАУ-ын талтай харилцаагаа хэвийн байдалд оруулахаар  нэлээд хичээж буй.

Тэгвэл өчигдрөөс дэлхийн томоохон хэвлэл мэдээллийн хэрэгслүүд “Далай лам дахин Монгол улсад айлчлахгүй” хэмээн мэдээлж эхэллээ.

Учир нь Монгол Улсын Засгийн газрын зүгээс Хятадын эрх баригчдад “Далай ламын айлчлал төрийн албан ёсны бус шашны урилга байсан тул энэ явдал нь Монгол Улсын байр суурийг бүрэн төлөөлөхгүй. Монгол Улс цаашид Далай ламыг эх орондоо төрийн урилгаар хэзээ ч урихгүй” гэж мэдэгджээ. Харин энэ мэдэгдлийг Хятадын “Синьхуа”, “China Daily” зэрэг хэвлэл мэдээллийн хэрэгсэлээр “Монгол Улс Далай ламыг дахин эх орондоо урихгүй гэх шийдвэр нь хоёр улсын харилцааг сэргээж болох сайн талтай. Монгол Улс энэ удаагийн явдлаас сургамж авсан болов уу гэж найдаж байна” гэж мэдэгдсэн юм.