УИХ-ын чуулганы нэгдсэн хуралдаанаар Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийж, анхны хэлэлцүүлгээр баталлаа.

Хууль батлагдсанаар жил бүрийн 11 дүгээр сарын 26-ныг “Тусгаар тогтнолын өдөр” болгон бүх нийтээр амардаг байхаар хуульчлагдаж байна. Чуулганы нэгдсэн хуралдаанаар уг хуулийн төслийг хэлэлцүүлгийн үеэр УИХ-ын гишүүн О.Баасанхүү “ Миний бие энэ хуулийн төслийн санаачлагчдын нэг. Миний бие эсрэг байр суурь илэрхийлэхдээ хууль санаачлагчаасаа татгалзаж байгаа хэрэг биш. Гэтэл намайг хууль санаачлагчаас хассан байна. Энэ нь миний хууль санаачлах эрхэд халдлаа. Өмнө нь УИХ-ын дарга байсан З.Энхболд микрофон хаадаг байсан бол энэ УИХ гишүүний хууль санаачлах эрхэд халдах гээд байна уу” гэхэд Төрийн байгуулалтын байнгын хорооны дарга Н.Энхболд “Байнгын хорооны хуралдаанаар О.Баасанхүү гишүүний эрхэд халдсан асуудал яригдаагүй” гэлээ.

Чуулганы хуралдаан үргэлжилж байна.