Олимпийн наадамд боксын төрөлд хүч үзэх манай баг тамирчид Бразил улсад очжээ. Тэд өнгөрсөн ням гарагт Рио-г  зорьсон бөгөөд 48 цагийн нислэгийн дараа өчигдөр Бразилд газардсан байна.

Манай тамирчдын багт Олимпийн аварга Э.Бадар-Ууган, МСБХ-ны ерөнхий нарийн бичгийн дарга Ц.Батнасан, боксын шигшээ багийн ахлах дасгалжуулагч Д.Батсүрэн, дасгалжуулагч Б.Эрдэнэбаяр, Энхтайван нар багтжээ. Тодруулбал, эрэгтэйчүүдийн 49 кг-д Г.Ган-Эрдэнэ, 52 кг-д Х.Энх-Амар, 56 кг-д Э.Цэндбаатар, 60 кг-д Д.Отгондалай, 64 кг-д Б.Чинзориг, 69 кг-д Б.Түвшинбат нар өрсөлдөх аж. “Рио-2016” олимпийн наадмын боксын төрөл ирэх сарын 6-наас 21-нд болно.