Мал төллөлт дуусч Монгол улс энэ онд 19.0 сая төл хүлээн авснаас  55.0 мянган ботго, 568.1 мянган унага, 954.4 мянган тугал,  9.4 сая хурга, 7.9 сая ишиг бойжиж одоогийн байдлаар улсын хэмжээнд 73.0 орчим сая малтай болоод байна. Нийт малын хорогдол 1.1 сая болж оны эхний нийт малын 1.9 хувийг эзлээд байна. Хамгийн их хорогдолтой нь Увс (181177), Сүхбаатар (169229), Завхан (118012), Архангай (111479),  Баянхонгор (107632)  аймгууд байсан. 
 
Одоогийн байдлаар зуншлага нийт нутгийн 70 гаруй хувьд хэвийн, 25 орчим хувьд буюу Баян-Өлгий, Увс, Ховд, Говь-Алтай, Завхан, Архангай, Баянхонгор, Өвөрхангай, Сэлэнгэ, Төв, Хэнтий, Дорнод, Дорноговь, Өмнөговийн зарим, Дундговь, Говьсүмбэрийн ихэнх сумдын нутгаар дунд, 5 орчим хувьд буюу Увсын Цагаанхайрхан, Говьсүмбэрийн Чойр, Дорноговийн Алтанширээ, Иххэт, Дундговийн Баянжаргалан, Өлзийт сумдын нутгаар муу байна.