УИХ-ын гишүүдийн микрофоныг тасалдаг ноён Зи-гийн үе  дуусгавар болж байна
Чуулганы танхимд төрийн түшээдийн бүрэн эрхэд шууд халдаж, үг хэлэх эрх чөлөөг нь хүртэл хаан боож ирсэн тэрбээр сүүлийн мөчид ард иргэдийг  зандарч яваа сурагтай. Орон нутагт хийсэн уулзалтынхаа үеэр тэтгэврийн хөгшнийг зандарсан гэнэ. Улс орон өрийн дарамтад орсонд санаа зовсон буурай “Эх орноо хэрхэн, яаж өр төлбөрөөс гэтэлгэх вэ” гэж  асуухад УИХ-ын дарга З.Энхболд “Таны зээлийг та л төлдөг болохоос би төлдөггүй” хэмээн нэлээд зандрангуй бас загнангуй хариулсан гэнэ. Үнэндээ “Баас хатавч өмхийгөө тавихгүй” гэдэг энэ л дээ. Энэ он гарсаар З.Энхболд дарга улам догшин дээрэнгүй авиртай болж, УИХ-ын гишүүдийг доромжилж эхэлсэн нь хэн хүний дургүйг хүргээд байгаа.

Тухайлбал, тэрбээр зарим гишүүнийг уймраагаар нь дуудаад зогсохгүй “Чиний ярьж байгаа чинь таалагдахгүй байна” гэж хэлээд УИХ-ын гишүүн Ё.Отгонбаярын микрофоныг хааж байсан удаатай. “Үг хэлэх эрх чөлөө хаана устана, тэнд дарангуйлал тогтоно” гэж Жон Перри хэлсэн байдаг. З.Энхболд ямар учраас дарангуйлагч вэ гэх асуултын хариулт ердөө л энэ. Төгсгөлд нь нэрт нийтлэлч  Г.Жамъян УИХ-ын дарга З.Энхболдыг хэрхэн тодорхойлсныг хүргэе. “З.Энхболд төрийн ажилд дарангуйлал бий болгож эхэлсэн. Би энэ хүнийг мэдэхийн дээдээр мэднэ. Монголчууд ОХУ-ын цэргийг эх орноосоо явуулахад олон байшин барилга, эд хөрөнгө үлдэж хоцорсон. Тэрнээс хөлжиж баяжсан хүний нэг нь байгаа юм. Дараа нь улс төрд орж ирээд олон бүтэлгүй ажил хийсэн. Түүний нэг нь Өвөрхангайд сонгуульд нэр дэвшиж оролцоод бөөн будилаан тарьсан. Тэр тухайд олон удаагийн шүүх хурал болсон. Би тэр шүүх хурлуудад сууж байсан болохоор асар их баримт бий. Дараа нь тэр Төрийн өмчийн хорооны дарга болоод бүр их “нүгэл” хийсэн дээ. Монголын хамаг сайхан үйлдвэрийг хувьчлахдаа өөрийн найз нөхөд, намынхан, танил талдаа өгсөн. Олон ч аж ахуйн газрыг дампууруулсан. Энэ бол шударга бус явдал байсан юм. Тэгвэл өнөөдөр тэр эд хөрөнгөөр ивээсэн хүмүүсээрээ дэмжүүлээд УИХ-д орж ирж дарга болсон. Тэгээд зогсоогүй намаараа гул барьж засаг, төрийн бүх эрхийг гартаа авлаа. Үүнийхээ хүчээр дарангуйлагчийн дүрийг олж авсан. УИХ-ын үйл ажиллагаанаас харахад энэ байдал ил тод байгаа биз дээ. Ер нь З.Энхболд гэдэг хүн зүгээр нэг сонгуулиар төрийн өндөрлөгт гарч ирээгүй гэдгийг би давтан хэлье. 2012 оны сонгуульд АН нэрсийн жагсаалт, хар машин хоёрын хүчээр ялсан юм шүү дээ. Нэрсийн жагсаалтын гол нь юу байсан бэ гэвэл Үндсэн хуульд заасан санал хураалт нууц байх гэснээр нуувч хийж нэрээ ил бичиж гарч ирсэн хүмүүс. Угаас нэрсийн жагсаалт гэдэг чинь хууль бус зүйл” хэмээсэн удаатай.

Ийнхүү нам нь засгийн эрх барих хугацаанд нэг хүн ингэтлээ гоцолж, “Дарангуйлагч, ноён”  гэх тодотголтой болсон нь магадгүй З.Энхболдоос өөр хэн ч биш байж болох. Учир нь эрх баригч нам дарангуйлагч  төрхтэй бас даргатай байх нь улс орныг уруудуулж, мууд даллахаас илүү гардаггүй жамтай. Ямар ч байсан дөрвөн жил төрийн ордонд ноёлсон З.Энхболдын цаг дуусч байна. Ард түмэн ухарсан сонголтоо засч, мандуулахыг хүсч байна.
 
С.БУЯН
Монгол Ардын намын сонгуулийн төв штаб
 
Бусдад түгээх
  • gplus