Төмөр замын төслүүдэд санхүүжилт хүсэв

Монгол Улсын Ерөнхий сайд Ч.Сайханбилэг Ази, Европын Сангийн сайд нарын уулзалтад оролцохоор Улаанбаатарт хүрэлцэн ирсэн Азийн дэд бүтцийн хөрөнгө оруулалтын банкны Ерөнхийлөгч, ноён Жин Личунийг өнөөдөр (2016.6.8) хүлээн авч уулзан Монгол Улс тус банктай хамтран ажиллах боломжуудыг хөндөн ярилцлаа.

Энэ оны нэгдүгээр сараас үйл ажиллагаагаа явуулж эхэлсэн Азийн дэд бүтцийн хөрөнгө оруулалтын банкны анхны үүсгэн байгуулагчдын нэгний хувьд Монгол Улс төлөвлөж буй дэд бүтцийн тодорхой төслүүдээ тус банкнаас санхүүжүүлэх боломжийг эрэлхийлж  байгааг Ерөнхий сайд дурдаад зээлийн хөрөнгийн эх үүсвэрээр нэгэнт баригдсан автозамуудад дахин санхүүжилт хийх, Тавантолгой-Гашуунсухайт чиглэлийн 267 км төмөр замын төсөл, ОХУ-БНХАУ-ыг Монголын нутгаар дамжуулан холбох төмөр замын төслүүдэд Монголын тал санхүүжилт хүсч байгааг уламжиллаа.

Ноён Жин Личун Ерөнхий сайдын санал болгосон төслүүдийн талаархи нарийвчилсан мэдээллүүдийг манай талаас хүсч, цаашид хоёр талын шинжээчид, мэргэжилтнүүдийн түвшинд судалгаа хийж, тодорхой ямар төсөл хэрэгжүүлэхэд хамтран ажиллах чиглэлээ тогтоё гэлээ.
Монголын мэргэжилтнүүд Азийн дэд бүтцийн хөрөнгө оруулалтын банкинд ажиллах боломжийг Ерөнхий сайд сонирхоход үнэхээр чадварлаг, өндөр мэргэжлийн хүмүүст тийм боломж нээлттэй гэж ноён Жин Личун хариулав.

100 тэрбум ам.долларын дүрмийн сантай байгуулагдсан Азийн дэд бүтцийн хөрөнгө оруулалтын банк эдийн засгийн үр ашигтай төсөлд их хэмжээний зээл олгох боломжтой ба ингэхдээ дэд бүтцийн томоохон төслүүдийг олон улсын банк, санхүүгийн бусад байгууллагуудтай хамтран хэрэгжүүлэх бодлого баримталдаг ажээ. Хувийн хэвшлийн аж ахуйн нэгжүүд тус банкнаас зээл хүсэхэд тухайн орны Засгийн газрын баталгаа шаарддаг байна гэж Засгийн газрын Хэвлэл мэдээлэл, олон нийттэй харилцах алба мэдээлэв.
 

Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.