Хог бүү хаяарай, хотоо хамт гоёцгооё

Нийслэлийн Засаг дарга Э.Бат-Үүлийн уриалга
 

Юуны өмнө хүний амьдралын хамгийн гэгээтэй мөчүүдийн нэг болдог Олон улсын хүүхдийн эрхийг хамгаалах өдрийн баярын мэнд хүргэе. Энхрий бяцхан үрсээ инээн баярлуулах Хүүхдийн эрхийн өдрөө энэ жил илүүтэй өргөн дэлгэр тэмдэглэцгээнэ. Хүүхдийн инээд хөөр эцэг, эхийн хайр халамжаар их хот дүүрэх сайхан.

Харин баяр ёслолоо хийхдээ хүн бүр, хүүхэд бүхэн хогоо ил задгай хаяхгүй, их хотын соёлтой оролцохыг уриалж байна.  Улаанбаатар жилдээ сая гаруй тонн хог “үйлдвэрлэдэг” их хот. Их хотын ажил их ээ. Та бидний шар хантаазтангууд гэж нэрлэдэг үйлчилгээний 775 хүн өглөөний ургах нарнаас эртлэн үдшийн бүрий тасартал Улаанбаатар хотоо цэвэрлэдэг. Өдөрт 321 машин хог тээвэрлэдэг, өчигдөр л гэхэд 2200 тонн хог хаягдал зөөвөрлөсөн дүн ширээн дээр минь байна. Гэгээн гэрэлтэй баярын дараа зам, талбай, өргөн чөлөө хог цаасандаа дарагдан хоцорч, хот тохижилтын ажилчид хөлсөө урсган тэр бүхнийг цэвэрлэхийг харах юу нь сайхан байх билээ. Их хотын иргэн болж өснө гэдэг хүссэн газраа хог хаяхгүй байж сурахаас, ногоон гэрэл хүлээж зогсохоос, бие биедээ зай тавьж өгөхөөс эхэлдэг шүү дээ. Эцэг эхчүүд маань ч гэсэн үр хүүхэддээ илүү сайхан хотод аж төрөг гэсэн чин хүслээрээ, хүний хөдөлмөрийг хүндэтгэн үлгэр дууриал үзүүлнэ хэмээн найдаж байна.

Та бид Нийслэл хэмээх нэгэн том өргөө гэрт, нэг л Улаанбаатартаа ажиллаж сурч,  илүү сайхан хотод аж төрөх хүсэл зорилгоороо нэгдмэл. Монголын минь үрс инээж байг. Сайхан баярлаарай.
 

Нийслэлийн Засаг дарга бөгөөд Улаанбаатар
хотын Захирагч Эрдэнийн БАТ-ҮҮЛ

Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.