Улстөрийн нам, эвслүүдийн хувьд шийдвэрлэх долоо хоног байв. Энэ долоо хоногийн эхэнд УИХ-ын дарга З.Энхболд чуулганы хуралдааныг гэнэтхэн завсарлуулав. Үүний дараагаар намууд нэр дэвшигчдээ тодруулах ажиллагаандаа орлоо.
УИХ-ын дарга захирамж гаргав
УИХ-ын дарга З.Энхболд чуулганыг түр завсарлуулах тухай захирамжийг энэ дугаар сарын 24-ны өдөр гаргалаа. УИХ-ын тухай хуулийн 11 дүгээр зүйлийн 11.2, 29 дүгээр зүйлийн 29.14 дэх хэсэг, Улсын Их Хурлын даргын дэргэдэх Зөвлөлийн саналыг харгалзан УИХ-ын 2016 оны ээлжит сонгуулийн үйл ажиллагаатай холбогдуулан УИХ-ын чуулганыг ирэх сарын 23-ны өдрийг хүртэл түр завсарлуулахаар захирамжид дурджээ.
МАХН-ын 10 гаруй гишүүн өлсгөлөн зарлаж эхэллээ
МАХН-ын дарга Н.Энхбаяр нарын 10 гаруй хүн өлсгөлөн зарлаж эхлэв.“Эрх чөлөө”, “Чингисийн талбай”-д жагсаал цуглаан, өлсгөлөн зарлах зөвшөөрөл холбогдох байгууллагаас өгөөгүй МАХН-ын төв байрны өмнө өлсгөлөнгийн арга хэмжээг эхлүүлсэн байна. МАХН-ын дарга Н.Энхбаяр, дэд дарга Э.Эрдэнэжамъян нарын зарим нэр дэвшигчдэд хууль хяналтын байгууллагаас УИХ-ын 2016 оны сонгуульд оролцуулахгүй хэмээн мэдэгдээд байгаа юм.
Намууд нэр дэвшигчдээ тодруулав
Улс төрийн хүчнүүд 2016 оны УИХ-ын сонгуульд нэр дэвшигчдээ хуулийн хугацаанд тодрууллаа баталлаа. АН-ын ҮЗХ, МАН-ын Бага хурал бямба гарагийн орой эхэлсэн ч УИХ-ын сонгуульд нэр дэвшигчдээ хуулийн хугацаанд тодруулан батламжилсан юм. Нэр дэвшигчид ирэх зургадугаар сарын 7-нд үнэмлэхээ гардан авна. Энэ хугацаанд ямар нэгэн хууль бус үйлдэл хийсэн гэх асуудлаар СЕХ-ноос эргэн татагдчихгүй л бол шүү дээ. Харин сонгуулийн сурталчилгаа зургадугаар сарын 11-нд эхэлнэ. УИХ-аас хориодхон хоногийн өмнө тойргийн сонгуулийн системээ өөрчилж, тойргийн хуваарилалтаа хийсэн. Энэ удаагийн сонгууль жижиг мажоритараар явагдах бөгөөд 76 тойрогт намууд нэг нэг хүнийг нэр дэвшүүлж байгаа юм.
Д.Сумъяа “Мастерс”-ын аваргаар гурав дахь удаагаа тодров
Жүдо бөхийн олимпийн эрхийн оноо олгох хамгийн сүүлчийн тэмцээн “World Masters-2016” эхэллээ. Дэлхийд чансаагаараа жин бүрийн эхнийд 16-д эрэмбэлэгдсэн шилдэг жүдочид урилгаар оролцдог тус тэмцээнд Монголын 18 жүдочид оролцож байгаа юм. Өчигдөр орой эхэлсэн тэмцээний эхний өдөр эрэгтэйчүүдийн 60, 66, эмэгтэйчүүдийн 48, 52, 57 кг-ын барилдаан боллоо. Дэвжээнд гарсан манай тамирчдаас ДАШТ-ий хүрэл медальт, Гавьяат тамирчин Д.Сумъяа /57 кг/ аваргын төлөөх барилдаанд Францын тамирчныг ялж, “Мастерс”-ын аваргаар гурав дахь удаагаа тодорч байгаа юм. Түүнчлэн, эрэгтэйчүүдийн 66 кг-д өрсөлдсөн ОУХМ Д.Төмөрхүлэг мөнгөн медаль хүртэв. Одоогийн байдлаар Д.Сумьяа /Алт/, Д.Төмөрхүлэг /Мөнгө/, Д.Амартүвшин /Хүрэл/, Г.Болдбаатар /Шагналт байр/, М.Уранцэцэг /Шагналт байр/-т тус тус шалгараад байна.
П.УНДРАМ
Оллоо.мн