Истанбул хоттой бүтээн байгуулалтын томоохон төслүүд дээр хамтран ажиллах санамж бичиг байгууллаа
Бүгд Найрамдах Турк Улсын Истанбул хотын Захирагч ноён Кадир Топбаш тэргүүтэй төлөөлөгчид Улаанбаатар хотод энэ сарын 24-26-ны  өдрүүдэд албан ёсны айлчлал хийж байна. Тэрээр айлчлалынхаа хүрээнд Монгол Улсын Ерөнхий сайд Ч.Сайханбилэг, НИТХ-ын дарга Д.Баттулга нарт бараалхаж, Нийслэлийн Засаг дарга бөгөөд Улаанбаатар хотын Захирагч Э.Бат-Үүлтэй Улаанбаатар болон Истанбул хотуудын хооронд хамтран ажиллах “Санамж бичиг”-т гарын үсэг зурлаа.
 
Истанбул хоттой ундны усны эх үүсвэрийг нэмэгдүүлэх чиглэлд хамтран ажиллана

Бүгд найрамдах Турк Улсын Истанбул хотын Захирагч болон зочид төлөөлөгчид өнөөдөр Нийслэлийн Засаг дарга бөгөөд Улаанбаатар хотын Захирагч Э.Бат-Үүлтэй уулзлаа.

Уулзалтын үеэр ноён Кадир Топаш Улаанбаатар хоттой барилга хот байгуулалт болон ундны усны хангамжийг сайжруулах, хог хаягдлын менежментийг сайжруулах зэрэг томоохон төслүүд дээр хамтран ажиллах сонирхолтой байгаагаа илэрхийллээ.

 Нийслэлийн Засаг дарга бөгөөд Улаанбаатар хотын Захирагч Э.Бат-Үүл, Истанбул хоттой тэргүүлэх хэд хэдэн чиглэлээр хамтран ажиллаж, туршлага солилцох хүсэлтэй байгаагаа илэрхийлээд тэр дундаа хог хаягдлыг дахин боловсруулах, ундны усны эх үүсвэрийг нэмэгдүүлэх зорилгоор Туул голыг түшиглэн байгуулах “Туулын Усан сан” төслийг хэрэгжүүлэхэд хамтран ажиллаж туршлага солилцох хүсэлтэй байгаагаа илэрхийлсэн юм. Мөн аялал жуулчлалыг хөгжүүлэхэд хамтран ажиллаж, дэмжлэг үзүүлэхийг хүслээ.

НИТХ-ын дарга Д.Баттулга Бүгд Найрамдах Турк улсын Истанбул хотын захирагч болон төлөөлөгчдийг хүлээн авч уулзах үеэрээ гэр хорооллын дахин төлөвлөлт болон агаар, хөрсний бохирдлыг бууруулахад чиглэсэн төсөл хөтөлбөрүүд дээр хамтран ажиллахыг хүслээ. Түүнчлэн нийслэлийн нийтийн тээврийг хөгжүүлэхэд дэмжлэг үзүүлэх, Улаанбаатар хотод Аялал жуучлалыг хөгжүүлэх чиглэлд хамтран ажиллахад бэлэн байгаагаа илэрхийлсэн юм. Истанбул хот нь жилд 10 сая гаруй жуулчин авдаг, Европын аялал жуулчлалын гол бүс болон хөгжиж байгаа хот юм. Иймд Улаанбаатар хотын аялал жуучлалыг хөгжүүлэхийн тулд  Улаанбаатар Истанбул хотуудын хооронд шууд нисэх нислэгийн тоог нэмэгдүүлэх нь чухал байгааг талууд онцлон тэмдэглэж байлаа.
 
Истанбул хотын төлөөлөгчийн газрыг Улаанбаатар хотод нээхээр тохиролцов

Улаанбаатар болон Истанбул хотуудын хоорондын харилцааг өргөжүүлэх, ах дүү хотуудын харилцаа тогтоох, харилцан туршлага солилцох зорилгоор хотууд хэд хэдэн чиглэлээр хамтран ажиллахаар  өнөөдөр санамж бичиг үзэглэлээ.

Санамж бичигт “Монгол наадам” цогцолборт хөрөнгө оруулж хамтран ажиллах,  хот төлөвлөлт, гэр хорооллын дахин төлөвлөлт болон Турк орон сууцны хороолол байгуулах, чиглэлээр хамтран ажиллах, барилгын материал үйлдвэрлэлийн салбарт хамтран ажиллах, инженер, дэд бүтцийн салбарт хэд хэдэн чиглэлээр  хамтран ажиллахаар тусгасан байна.

Мөн  мах махан болон сүү, сүүн бүтээгдэхүүнийг боловсруулах технологийг нэвтрүүлж, цаашид харилцан бүтээгдэхүүн ханган нийлүүлэх талаар туршлага солилцох, Туркийн жишиг дунд үйлдвэрлэлийн хотхон бий болгох, технологи нэвтрүүлэхэд, аялал жуулчлалд хөрөнгө оруулахад дэмжлэг үзүүлэхэд  онцгойлон анхаарал хандуулж хамтран ажиллахаар тохиролцов.

Түүнчлэн санамж бичгийн хүрээнд энэ ондоо багтаан хотууд харилцан төлөөлөгчийн газрыг нээж  худалдааны болон соёлын төвүүд байгуулах ажлыг эхлүүлэх бөгөөд санамж бичигт тусгасан төслүүдийг ажил хэрэг болгон хэрэгжүүлэх зорилгоор тус бүртээ ажлын хэсэг байгуулах юм байна.

Истанбул хотын даргын айлчлалын бүрэлдэхүүнд хотын Захирагчийн зөвлөхүүд, Истанбул хотын консул, Захирагчийн ажлын албаны дарга болон тус хотын төрийн өмчит компаниудын төлөөлөл бүхий 14 хүн багтсан байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.
  • ККК.... 2016-04-26 01:58:07
    ккк...Туркүүд ... гранд лайн... Одоо манайх хулхидуулж таарна.
  • Иргэн 2016-04-25 11:30:45
    Османууд мундаг. Европын хятадууд. Монголыг зажлахгуй залгина. Угаасаа тэдний анхны нутаг
  • zaluu 2016-04-25 10:07:25
    ok
  • монгол 2016-04-25 08:36:38
    За даа түркийн жижиг дунд үйлдвэрийг хөгжүүлснээс өөрийхийгөө хөгжүүлбэл дээр баймаар