УИХ-ын ээлжит бус чуулганыг  маргааш буюу энэ сарын 29-ны өдөр зарлан хуралдуулахаар болсон билээ. Тэгвэл ээлжит бус чуулганаар ямар асуудал хэлэлцэх вэ гэдэг олны анхаарлыг татаад байсан. Олон нийтийн зүгээс болоод Эрүүл мэндийн ТББ-уудын төлөөллүүд мэдээлэл хийж нэн тэргүүнд ЭМСЯ-ыг эзэнтэй болгож, шинэ сайд томилохыг хүсэж байсан. Тэгвэл энэ удаагийн ээлжит бусаар уг асуудал хараахан хэлэлцэгдэхгүй юм байна.

Харин чуулганаар цөмийн аюулгүй ажиллагааны тухай 1994 оны конвенцид нэгдэн орохтой холбоотой багц хуулийн төслүүдийг соёрхон батлахаар төлөвлөөд байна. Гэвч гэнэт Цөмийн хог хаягдлыг хэлэлцэх болсонд байгаль орчны төлөөх ТББ-ууд ихээхэн  дургүйцэж, хардаж буйгаа илэрхийлж эхлээд байна. 

Монгол Улсын нутаг дэвсгэрт цөмийн хаягдал булшлах нь гэх мэдээлэл өнгөрсөн хугацаанд нэлээд гарч байсан ч тухай бүрд нь Монгол Улс цөмийн хаягдал булшлахгүй гэх мэдэгдлийг холбогдох албаныхан өгсөөр байсан билээ.Харин энэ удаад Монгол Улс цөмийн хог хаягдал булшлахгүй байхыг албан ёсоор хуульчилна гэдгийг УИХ-ын албан мэдээлэлд дурджээ.  

Ямартай ч ээлжит бус чуулганаар хэлэлцэх асуудлын жагсаалтыг хүргэж байна. 

Ашигласан түлшний болон цацраг идэвхт хаягдлын менежментийн аюулгүй ажиллагааны тухай 1997 оны конвенцид нэгдэн орох тухай хуулийн төсөл;

Бага хэмжээний цөмийн материалын шинэчилсэн протоколыг соёрхон батлах тухай хуулийн төсөл;

Цөмийн аюулгүй ажиллагааны тухай 1994 оны конвенцид нэгдэн орох тухай хуулийн төсөл;

Цөмийн материалыг биечлэн хамгаалах тухай 1980 оны конвенцийн 2005 оны нэмэлт, өөрчлөлтийн тухай протоколыг соёрхон батлах тухай хуулийн төсөл;

Үндсэн хуулийн цэцийн 04 дүгээр дүгнэлт.

Ээлжит бус чуулган энэ дөрөвдүгээр сарын 1 хүртэл үргэлжлэх юм байна.