Хулгай дээрмийн гэмт хэргийн гаралт буурахгүй байна. Мөн хамгийн цөөн үйлдэгддэг банк дээрэмдэх гэмт хэрэг ойр ойрхон гарах боллоо.
Саяхан "Сод Монгол" шатахуун түгээх станцын түгээгчийг зодож, 300 мянга гаруй төгрөгийн орлогыг гар утастай нь дээрэмдсэн хэрэг Төв аймгийн Аргалант суманд гарсан. Уг хэргийг үйлдэгч таван залууг Цагдаагийн байгууллага шуурхай ажилласны үр дүнд хугацаа алдалгүй барьсан.Тэгвэл тус дээрмийн хэрэг гардаг өдөр Нийслэлийн Баянзүрх дүүргийн 97 дугаар сургуулийн хажуугийн "Төрийн банк"-ийг зэвсэгтэй этгээдүүд дээрэмдсэн ажээ. Гэмт этгээдүүд банкнаас хоёр сая төгрөг дээрэмдсэн байна. Баянзүрх дүүргийн цагдаагийн хэлтэс шуурхай ажиллан гэмт хэрэгтнүүдийг баривчлахад Төв аймгийн Батсүмбэр сумын харьяат 30 настай, эрэгтэй Г гэгч нь бусадтай бүлэглэн, галт зэвсэг ашиглан дээрэм хийсэн байжээ. Эл хэрэгт эрүү үүсгэн шалгаж байна.
Г.Уянга
Olloo.mn
Olloo.mn