Засгийн газрын хэрэг эрхлэх газрын дарга С.Баярцогт өнөөдөр мэдээлэл хийв. Өнгөрсөн сард УИХ-ын гишүүн О.Баасанхүүгээс “Засгийн газрын хэрэг эрхлэх газрын дарга С.Баярцогтыг үүрэгт ажлаа хийж чадахгүй байна” гэх үндэслэлээр огцруулах хуулийн төслийг УИХ-ын даргад өргөн мэдүүлсэн. Тэгвэл Үндсэн хуулийн Цэцийн хуралдаануудаас “УИХ-ын гишүүн нь сайд огцруулах хуулийн төслийг санаачлан УИХ-аар хэлэлцүүлж байгаа нь Засгийн газрын танхимаар ажиллах зарчмыг үгүйсгэж байна” гэсэн дүгнэлтийг гаргасан байдаг.
Ийм дүгнэлт гарсаар байхад УИХ-ын гишүүн О.Баасанхүү “Цэц УИХ-ын бүрэн эрхэд халдлаа. Сайд С.Баярцогтыг огцруулахгүйн тулд улс төржлөө” гэх мэдээллийг хийсэн. Үүнд нь ЗГХЭГ-ын дарга дараах тайлбарыг хийсэн юм.
Тэрбээр “О.Баасанхүү гишүүн үндэслэлтэй, үнэн зүйл яримаар байгаа юм. Өнгөрөгч есдүгээр сарын 9-нд Үндсэн хуулийн цэц дунд суудлын хуралдаанаар Монгол Улсын Их хурлын тухай хуулийн 7.1.12 дахь заалт Үндсэн хуулийн холбогдох заалтыг зөрчсөн эсэх маргааныг хянан шийдвэрлэсэн тухай асуудлыг хэлэлцээд Үндсэн хууль зөрчсөн тухай 11 дүгээр дүгнэлт гаргасан.
Гэтэл С.Баярцогт гэдэг хүнд хэргээр хамаатуулж, захиалсан мэтээр гүжирдэж байна. Тэгээд ч огцруулах асуудлыг есдүгээр сарын 6-нд УИХ-д өргөн мэдүүлсэн гэж О.Баасанхүү гишүүн ярилцлагадаа дурдсан байсан. Тэр өдөр нь амралтын буюу ням гариг байсан. Монгол Улсын Их хурал ням гаригт хуулийн төсөл хүлээж авдаггүй. Ийм байтал УИХ-ын гишүүний нэр хүнд, хэвлэл мэдээллийг ашиглаад худлаа ярьж байна. Ерөсөө баримт гаргаж ирж тавихгүй байгаа нь О.Баасанхүү гигүүнийг худлаа ярьж байгааг илтгэж байна” гэв.
Мөн өнгөрсөн долоо хоногт УИХ-ын Хууль зүйн байнгын хорооны хуралдаанаар Үндсэн хуулийн Цэцийн 11 дүгээр дүгнэлтийг хэлэлцэх үед Засгийн газар ямар үндэслэлээр Цэцэд 300 сая төгрөг шилжүүлсэн бэ гэдэг асуудал үүссэн. Үүнтэй холбоотойгоор УИХ-ын гишүүн О.Баасанхүү “Засгийн газар Цэцийг авлигадлаа” гэж ярьсан. Энэ тухайд сайд С.Баярцогт “Үндсэн хууль батлагдсаны 25 жилийн ойг ёсчлон тэмдэглэх хүрээнд хөрөнгө гаргахаар болсон. Түүнээс Цэцэд мөнгө төсөвлөсөн зүйлгүй. Тус ойг тэмдэглэх асуудал дөрвөн сарын өмнөөс яригдаж, Ерөнхийлөгчийн зарлиг энэ оны наймдугаар сарын 28-нд гарсан.
Үндсэн хууль батлагдсаны 25 жилийн ойг 2017 онд тэмдэглэнэ, бэлтгэл хангах хүрээнд ажил хоёр жил дамнан үргэлжилнэ. Гэхдээ эдийн засгийн байдал хүнд байгаа учраас нэг ч төгрөг шилжүүлээгүй байгаа” гэсэн. Мөн тэрбээр би албан тушаалаасаа буух ямар ч боломжгүй. Яагаад гэвэл би нийт иргэдээсээ уучлалт гуйж, УИХ-ын дэд даргын албан суудлаа өгч чөлөөлөгдсөн.
Хоёрдугаарт, төрийн албан хаагчид үндэслэлгүйгээр ажлаас халагдсан асуудалд Засгийн газрын хэрэг эрхлэх газар холбогдолгүй. Гуравдугаарт, Засгийн газар, УИХ-ыг муу холбон ажиллаж байна гэсэн. Харин ч харилцааг нь сайн барьж ажиллаж байгаа” гэж мэдэгдэв.
С.Цээл
Olloo.mn
Olloo.mn