Баянгол дүүргийн 14-р хорооны 16-р байрны хажууд Би Жи Би Жи компани 18 давхар орон сууц барихаар зэхэж, гаражын зориулалтаар зургаан метр орчим гүн нүх ухсанаас тус байрыг нурах аюултай боллоо хэмээн оршин суугчдыг нүүлгэн шилжүүлж байсан цаг саяхан.  Ингэж нүүлгэн шилжүүлээд сар гаруйн хугацаанд тус байрны оршин суугчдыг зочид буудалд байрлуулсан юм. Харин энд нэлээд их мөнгө зарцуулсан тооцоо бий. Тухайн үед нүхийг НЗДТГ-ын нөөц хөрөнгөөс санхүүжүүлэн булж, хөрсийг хүчитгэх ажил хийсэн билээ. Мөн Би жи би жи компанийн барилга барих зөвшөөрлийг цуцлахаар болсон талаар тус дүүргийн Засаг дарга Д.Оросоо мэдээлж байв. Харин Нийслэлийн Ерөнхий төлөвлөгөөний газраас тус газарт тоглоомын талбай гараж барина хэмээж байсан юм. 

Тэгвэл өнөөдрийн байдлаар хажуугийн байраа нурах эрсдэлд оруулчихаад  ухсан нүхээ таглах мөнгө байхгүй хэмээн хээв нэг хэлж суусан “Би Жи Би Жи” компанийнхан өнөөх барилгын ажлаа дахин эхлүүлсэн байна. Учир нь тухайн компанийн барилга барих эрхийг  өнөөг хүртэл цуцлаагүй байгаа аж.  Эрхийг нь цуцална хэмээн ам бардам хэлж суусан Засаг дарга Д.Оросоо ч өнөөдөр нам гүм байна.


Харин 16-р байрны оршин суугчид л барилгын ажлаа эхлүүлсэн компанийн хүмүүстэй уулзаж учир байдлыг тодруулсан талаараа хэлж байна. Тодруулбал 16-р байрны оршин суугч Б.Мажда “Би жи би жи компанийхны тайлбарлаж байгаагаар эхний ээлжинд хамгаалалтын хана босгож байна. Гэхдээ дан ганц хана барих бус нийтэд нь барилгын суурийг хийж байгаа. Цаашдаа барилга барина гэдгээ хэлж байна. Харин нийслэлийн ерөнхий төлөвлөгөөний газраас тухайн суурин дээр тоглоомын талбай граш барина гэсэн ямар ч зураг төсөл гараагүй, эцэслэн шийдэгдээгүй асуудал. Зөвхөн яригдаж байсан төдий. Тэгэхээр барилга хот байгуулалтын яамнаас зөвшөөрөл өгсний дагуу 16-р байрны хажууд 18 давхар барилга босох нь тодорхой болж оршин суугчдад тоглоомын талбай байгуулж өгнө гэсэн нийслэлийн удирдлагуудын үг худал болж таарлаа” хэмээн ярилаа. 



Харин бид энэ асуудлаар албаныхнаас тодруулахаар Нийслэлийн Ерөнхий төлөвлөгөөний газар луу залгахад хариулт өгөх хүн олдсонгүй. Тэд “Манайд хамаагүй 16-аас дээш давхар барилгын зөвшөөрлийг бид өгдөггүй БХБЯ-аас асуу” гэлээ.Ингээд бид  БГД-ийн Засаг дарга Д.Оросоогоос  зарим зүйлийн талаар тодрууллаа. 

-Дүүргийн чинь нутаг дэвсгэр дээр зөвшөөрөлгүй барилга барьж оршин суугчдын тав тухыг алдагдуулж байсан “Би Жи Би Жи” компанийнхан дахин  барилгын ажлаа эхлүүлчихсэн байна. Уг нь тусгай зөвшөөрлийг нь цуцална гэж байсан биз дээ?
-Уг нь тусгай зөвшөөрлийг нь цуцлах ёстой. Иргэд оршин суугчдын тав тухыг алдагдуулж, багагүй мөнгө хөрөнгө зарцуулж тус компанийн тарьсан балгыг арилгасан. Гэтэл дахиад барилгын ажлаа эхлүүлснийг бид буруу гэж үзэж байна. 

-Энэ талаар танайхаас үйл ажиллагаагаа зогсоох шаардлага хүргүүлсэн үү?
-Манай зүгээс барилгын үйл ажиллагааг зогсоох эрхзүйн заалт байхгүй. 

-Тэгвэл холбогдох албаныханд мэдэгдсэн үү?
-Тиймээ мэдэгдсэн. Дүүргийн газрын албанаас өнгөрсөн долоо хоногт МХЕГ, АТГ, Нийслэлийн Ерөнхий төлөвлөгөөний газар, Нийслэлийн Засаг дарга Э.Бат-Үүл нарт албан бичиг хүргүүлсэн байгаа. 


Албаныхан нэг иймэрхүү хариулт өглөө. Анх орон сууцны дунд гараж барих зориулалтаар авсан газраа жил ирэх бүр тэлсээр байгаад худалдаа үйлчилгээний төвтэй 18 давхар орон сууцны барилга болгон өөрчилж чадсан тус компанийн ард хэн нэгэн эрх мэдэлтэн байна уу. Хууль бусаар барилга барьж эхлээд хажуугийн байрны оршин суугчдад аюул учруулчихаад хохирлыг нь барагдуулах хөрөнгө байхгүй хэмээн  улсаар төлүүлсэн тэд харин барилгын ажлаа эхлүүлэх мөнгөтэй байжээ. Гэвч холбогдох албаныхан бие биерүүгээ чихэн асуудлын хажуугаар хэдий хүртэл дуугүй суух вэ?