УИХ дахь АН-ын бүлгийн дарга Д.Гарамгайбаатар МАН-ын бүлгийн дарга С.Бямбацогтод мэдэгдэл хүргүүлсэн байна. Тус мэдэгдэлд “АН, МАН- ын хооронд байгуулсан “Харилцан итгэлцэл, хамтын ажиллагааны гэрээ”-ний хэрэгжилтийг хангалтгүй гэж үзлээ. Хамтарсан Засгийн газраас өргөн барьсан эдийн засаг, нийгэм, хууль эрх зүйн чухал ач холбогдолтой хууль тогтоолын төслийг хэлэлцэж шийдвэрлэхийн төлөө танай бүлэгт олон удаа санал тавьж ажилласан хэдий ч тодорхой үр дүн гарсангүй гэж АН-ын бүлгийн гишүүд үзэж байна.

Энэ удаагийн ээлжит чуулган завсарлахад бага хугацаа үлдэж байгаа учир зайлшгүй шаардлагатай хуулийн төслүүдийг цаг алдалгүй хэлэлцэн батлах нь Монголын ард түмний эрх ашигт нийцнэ. Иймд гэрээний хэрэгжилтэд анхаарч төлөвлөсөн хууль, тогтоолын төслүүдийг хэлэлцэж батлахад саад учруулахгүй хамтран ажиллахыг УИХ дахь МАН-ын бүлэгт мэдэгдэж байна” гэжээ. Өнгөрсөн долоо хоногт АН-ын Гүйцэтгэх зөвлөл хуралдаж хамтын ажиллагааны гэрээний биелэлтийг дүгнэхийг бүлгийн гишүүддээ даалгасан. Энэ дагуу АН-ын бүлэг өчигдөр хуралдаж дээрх шийдвэрийг гаргасан билээ.

Б.Сансар
olloo.mn