Ойрд ийм сайхан мэдээ дуулсангүй хэмээн хүмүүс баярлаж, хөөрцгөөж байна. Энэ бол “Asian’s Got Talent” шоу наадамд Монгол Улсаа төлөөлөн оролцсон “Хөсөгтөн” хамтлаг дэд байранд шалгарсан явдал юм.
2014 оны 11 дүгээр сараас хойш тасралтгүй зургаан сарын турш олон давхар шүүлт, шалгуурыг даван, “Хөсөгтөн” хамтлагийн авьяаслаг залуус тал нутгийн гайхамшгийг мэдрүүлж, Ази тивийн олон тэрбум авьяастнуудын дундаас шалгарч, Монголын язгуур урлагийг дэлхийн тавцанд гайхуулж чадлаа шүү дээ.
Тиймээ, “Хөсөгтөн” хамтлаг, морин хуурч, хөөмийч В.Батзориг, лимбэчин, цохиур хөгжимчин, хөөмийчин Г.Адъяадорж, товшлуурч, хөөмийч, дунд хуурч Х.Уламбаяр, их хуурч, хөөмийч Д.Ариунболд, ятгачин, дуучин Ч.Амарбаясгалан, морин хуурч, хөөмийч О.Чулуунбаатар гэх авьяаслаг залуусаар бахархахгүй байхын аргагүй.
Гуравхан сая Монгол түмний төлөөлөл дэлхийн авьяастнуудтай энэ зэрэгцэж, Монголын тал нутгийн гайхамшигт өв соёлыг түгэн таниулж чадна гэдэг нь хамгийн том бахархал. Бид морин хуур, хөөмий гэх гайхамшигт соёлын өвтэй. Энэ гайхамшиг өв соёл бидний юм хэмээн дэлхийд тамга дарж чадлаа хэмээн бахархаж байна. Шоунд түрүүлээгүй байж болно. Гэхдээ “Хөсөгтөн” хамтлагийн авьяаслаг залуус шоунд түрүүлснээс илүү гавьяаг байгууллаа хэмээн Монгол түмэн шагшин магтаж байна. Энэ та бүхний эхлэл. Баярлалаа. Бас баяр хүргэе.
Ами
Olloo.mn