Ази тивийн аварга шалгаруулах чөлөөт бөхийн эрэгтэйчүүдийн 28, эмэгтэйчүүдийн 18 дахь тэмцээн Катарын нийслэл Доха хотын “Aspire” спорт цогцолборт үргэлжилж байна. Өчигдөр эрэгтэйчүүдийн 61 кг-д зодоглосон ОУХМ Б.Номин хүрэл медаль хүртжээ. Түүний жинд 15 бөх өрсөлдсөнөөс манай тамирчин нэгдүгээр тойрогт Пакистаны Рамил Реженовыг 4:2, хоёрдугаар тойрогт Ардчилсан Солонгосын Кук Кван Кимийг 11:8-аар тус тус хожиж, мөнгөн медалийн төлөө Казахстаны бөх, ДАШТ-ий хүрэл медальт Дуалет Ниябековт 10:15-аар дийлдсэн ч хүрлийн төлөө Кыргызстаны Адилет Маматовыг 6:6-гаар ялжээ. 

97 кг-д тамирчныхаа өмнөөс барилдсан, шигшээ багийн дасгалжуулагч, гавьяат дасгалжуулагч Ц.Цогтбаяр VIII байранд орсон байна.

Өнөөдөр манай эмэгтэйчүүд дэвжээнд гарна. Тухайлбал, 53 кг-д дэлхийн залуучуудын аварга Э.Даваачимэг Японы Н.Ириетэй, 55 кг-д ОУХМ П.Орхон БНХАУ-ын Хүи Литэй, 60 кг-д ДАШТ-ий хошой хүрэл медальт, гавьяат тамирчин Т.Мөнхтуяа Японы Ё.Каяматай, 63 кг-д ОУХМ Э.Цэвэгмид БНХАУ-ын Жүома Шилуотой, 69 кг-д ОУХМ Ш.Түмэнцэцэг БНХАУ-ын Фен Жоүтэй тус тус оноолт таарчээ.