Ерөнхий сайд Ч.Сайханбилэг долоо хоног бүр нийгэмд тулгамдсан нэг асуудлыг шийдвэрлэж байхаар болжээ. Энэ талаар Ерөнхий сайдын зөвлөх Ц.Мөнхтөр мэдээлэл хийлээ.
Өнгөрсөн долоо хоногт Ерөнхий сайд Ч.Сайханбилэг яам, агентлаг, төрийн өмчит байгууллагуудын албан хэрэгцээнд шатахуун их зарцуулдаг, том оврын автомашин хэрэглэхийг зогсоох шийдвэр гаргасан. Төрийн өмчит 757 байгууллагад судалгаа явуулахад 5058 автомашин ашиглаж байгаагийн 812 нь том оврын, 159 дунд оврын жип машин байна. Судалгаанд хамарсан байгууллагууд нэг автомашинд жилд дунджаар 3889 литр шатахуун зарцуулж байгаа нь хот доторх үйлчилгээнд 100 км-т 16 литрээс ихгүй шатахуун хэрэглэдэг суудлын автомашин ашиглахыг хориглосон Засгийн газрын тогтоолыг зөрчсөн байсан. Тиймээс Ерөнхий сайд Ч.Сайханбилэг яам, агентлаг, төрийн өмчит байгууллагуудын албан хэрэгцээнд шатахуун их зарцуулдаг, том оврын автомашин хэрэглэхийг зогсоохыг яам, агентлагуудад даалгасан. Энэ хүрээнд шаардлагад нийцээгүй 1000 гаруй жип машиныг дуудлага худалдаагаар худалдах ажлыг Төрийн өмчийн хороо зохион байгуулна хэмээн Ерөнхий сайдын зөвлөх Ц.Мөнхтөр хэллээ.
Түүнчлэн, Энэ долоо хоногт Төрийн тусгай албан хаагчдын эмнэлгийн барилгыг эмнэлгийн зориулалтаар ашиглах шийдвэр гаргасан. Учир нь “Монголын хүн ам гурван саяд хүрсэн. Тиймээс нийгэмд эмнэлэг, сургууль, цэцэрлэг байгуулах нь туйлын чухал. Улсын нэгдүгээр төв эмнэлгийнхний санаачилсан “Нэг эмнэлэг хоёр жигүүр” төслийг дэмжиж, Төрийн тусгай албан хаагчдын эмнэлгийн барилгыг энэ оны наймдугаар сараас зориулалтаар нь ашиглахыг холбогдох албаны хүмүүст үүрэг болгосон” талаар ярив.
Г.Уянга
olloo.mn